هل تأكل كثيرا؟.. ربما عليك الحذر بعد قراءة هذه القصة

تحذير للناس اللي بتاكل كتير وشهيتها مفتوحة، اتعلم من تارار

تارار ده اتولد في فرنسا ومن صغره أهله اكتشفوا إنه بياكل كتير جدا وتقريبا مش بيشبع، لو حطوله عجل هياكله وبرضه هيفضل جعان، وده خلاهم يطردوه من البيت عشان مش قادرين يتحملوا مصاريفه.

تارار لقى نفسه في الشارع وفي نفس الوقت شهتيه مفتوحة عايز ياكل طول الوقت، بدأ ينضم لمجموعة من الحرامية وقطاعين الطرق عشان يسرق معاهم والأهم من السرقة إنه يلاقي أكل، سابهم وعرف شوية مشعوذين وسحرة بيعملوا عروض للناس في الشارع، فكان بيقدم عروض معاهم، كان بياكل أحجار وتعابين وحيوانات حية وقطط وليلة كبيرة أوي سعادتك.

دخل الجيش الفرنسي وياريته ما دخل، طبعا أكل الجيش مينفعش مع واحد زي دا والنتيجة إنه صحته كانت في النازل فنقلوه للمستشفى العسكري، وهناك برضه الأكل مكنش بيكفيه مع إنهم كانوا بيقدموله أربع وجبات، بدأ يدور في الزبالة وبواقي الأكل بتاع باقي العيانين على حاجة ياكلها لدرجة وصل بيه الحال إنه كان بيبلع الضمادات!

قادة الجيش قلقوا بقى، دا شوية كمان وهياكلنا إحنا شخصيا، عرضوه على طبيب في الجيش عشان يشخص حالته، جابوله وجبة تكفي 15 جندي لحمة ورز وما لذ وطاب، الراجل يا عيني كلهم كده كإنهم تسليك سنان!

قاموا جابوله قطط صاحية وأفاعي، قام واكلهم بالهنا والشفا مطرح ما يسري يمري!

طب وبعدين؟.. الطبيب ده جاتله فكرة قالهم طب ما تيجوا نستغل قدراته دي في خدمة الجيش بتاعنا، قالوله إزاي قام جايبله صندوق خشب وحط جواه وثيقة ورقية وقاله كل، كله فعلا وبعد يومين طلعوا الوثيقة سليمة من البراز بتاعه وقدروا يقرأوها فعلا بغض النظر عن الريحة طبعا!

قالوله إنت هتبقى مرسال هنبعت معاك وثائق سرية مهمة تبعتها للقوات تبعنا في الأماكن الأخرى، بس قائد الجيش كان خايف من الحوار ده ما يمكن يكون مجنون وقدراته العقلية ضعيفة يقوم يودينا في داهية، إحنا هنبعت معاه وثيقة عادية بس هنقوله إنها وثيقة مهمة وسرية ونشوف، الراجل قالهم ماشي بلع الوثيقة ومشي في طريقه، بس لإنه مكنش بيعرف يتكلم ألماني، أهل المنطقة شكّوا فيه وبلغوا القوات واتقبض عليه، فضلوا يفتشوا فيه طبعا مش هيلاقوا حاجة، دي الوثيقة في الأمانات!

فضلوا يعذبوه ويضربوه لحد ما قالهم خلاص أنا هعترف، أنا معايا وثيقة سرية مهمة، فين يابني إحنا فتشناك ملقيناش حاجة، قالهم سيبوني أعمل زي الناس عشان أوريهالكم، المهم بعد ما شافوا الوثيقة وعرفوا إنها مش سرية ولا حاجة القائد قالهم اعدموه وقبل تنفيذ الحكم صعب عليه وقالهم خلاص سيبوه وانقلوه من مكان ما جه.

الراجل رجع المستشفى العسكري تاني خلاص فاض بيه وعايز يشوف حل للشهية اللي عنده دي، فطلب من الطبيب اللي بيعالجه إنه أنا زهقت وشوفلي حل يوقف الشهية دي بأي طريقة، الطبيب جرب معاه كذا طريقة عشان يسد الشهية لكن فشل، وفضل الراجل كل ما ياكل أكتر يجوع أكتر، مسكوه في مرة بياكل جثث في المشرحة وبيشرب دم!

لحد ما في مرة اختفى طفل مكملش سنة، وطبعا اتهموه بإنه كله ومكنش فيه أدلة بس خلاص هو اتعرف بالتصرفات دي فقالوله مع السلامة وطردوه من المستشفى ومن الجيش كله.

بعدها بأربع سنين تعب ورقد في السرير اتصل بالطبيب اللي كان بيعالجه قاله أنا بلعت شوكة دهب وحاسس إنها واقفة في حلقي وهي سبب رقدتي في السرير، الطبيب كشف عليه وعرف إنه مصاب بمرض السُل وفضل في حالة إسهال غزير لحد ما مات على الحالة دي.

الغريب إن الراجل ده كان شكله وهيئته عادية جدا، مكنش تخين أوي زي ما الناس ممكن تتخيله، ومكنش بيعاني من أي خلل عقلي بالعكس كان سليم جدا! ..

متهيألي بعد القصة دي، لازم تراجعوا نفسكم وتلتزموا بالدايت خصوصا الناس اللي مش بتشبع وبتاكل كتير!