التطبيق الفعلي لمقولة "وسطك وسط بلاستيك"

التطبيق الفعلي لمقولة "وسطك وسط بلاستيك"

زمان في فترة القرن الـ 16 وما بعد ذلك وانتشار الطبقات الأرستقراطية، كان من ضمن معايير الجمال والموضة عندهم إن الست يكون خصرها(وسطها) يعني نحيف جدا.. بالنسبالهم دي كانت الست الجميلة المُثيرة الفاتنة.

الستات كانوا ممكن يدفعوا كل فلوسهم عشان يحصلوا ع وسط بلاستيك وصغير جدا.. كانوا بيلبسوا كورسيه تحت الملابس ويربطوه ع وسطهم ويشدوا الحزام جامد!

من ضمنهم كانت "إيثل جرانجر" عود القصب اللي في الصورة دي.. جوزها كان عالم فلك وكان بيموت جدا في الوسط الرفيع، وهيا كمان كانت حابّة طبعا تكون سيدة فاتنة من سيدات المجتمع، لبست الكورسيه ده وفضلت منتظمة فيه مبتخرجش خروجة إلا وهي لابساه.

لحد ما في يوم قاست وسطها لقته 55 سم.. فضلت مستمرة في لبس الكورسيه ع وسطها حوالي 10 سنين!

سنة 1939 وصل خصرها لـ 33 سم ودخلت موسوعة جينيس للأرقام القياسية!

إنت متخيل وسطها كله ع بعضه عبارة عن 33 سم؟!.. يعني دي في يوم لو زهقت منها وعايز تخنقها ممكن تخنقها من وسطها بدل رقبتها!.. ممكن كمان تمسكها من وسطها وتلعب بيها يمين وشمال.
ماتت وهي عندها 77 سنة.

السؤال بقى هل إنتي كبنت عندك الجرأة تمسكي مسطرة وتقيسي وسطك وتشوفيه هيطلع كم؟.. طبعا محتاجين مسطرة T بتاع الرسم في هندسة.

ع الجانب الآخر بقى، الموضة دي سجلت حالات وفيات كتيرة.. يعني فيه ست ماتت بسبب إن أضلاعها خرمت الكبد بتاعها!

ستات كتير ماتت بسبب ضيق منطقة البطن اللي بتخلي عملية التنفس والهضم صعبة جدا وبتعمل تشوه في القفص الصدري.

هَوس الستات بالجمال والمظهر الخارجي في بعض الأحيان كلفّهم حياتهم، وده بيوضح لنا ليه البنات بتقف بالساعات قدام المراية بينما إحنا كولاد ع وضعنا مش بنبالغ، بندي كل حاجة حجمها.. لإننا مؤمنين بمبدأ "الحلاوة حلاوة الروح"

اعقلوا يا بنات وهوّنوا ع نفسكم شوية.. الشكل مش كل حاجة!